Бугарија ќе изгради 2,5 км пруга до границата

За ова се разговарало на меѓувладината економска комисија со која претседаваа министрите Крешник Бектеши и Росен Жељазгов. Бугарија ќе се фокусира на изградбата на 2,5км пруга што недостига од коридорот 8, а се разговарало и за нови интерконекциски енергетски поврзувања меѓу двете земји.

Росен Жељазгов-министер за транспорт,ИТ и комуникации на Бугарија

,,На бугарска страна постојат само 2,5 километри кои што не се изградени. Другиот дел од железничката инфраструктура ќе биде модернизиран и рехабилитиран и со нова телекомуникациска сигнализација.Тоа се деловите Софија-Перник-Радомир-Ѓуешево-Граница. Заеднички ќе го изградиме 2 километра долгиот тунел кој што ќе поврзува без железничка станица и ќе се поминува транзит меѓу двете земји.“   

Министерот Жељазгов потврди дека Бугарија е посветена, пругата Скопје-Софија да биде реалност до 2025-26-та ,но исто така и да се реализираат планираните интерконекциски поврзувања  меѓу Петрич и Струмица,   на гасоводните и на електропреносните системи меѓу двете земји. Во функција на раст на туризмот било разговарано и за воведување сезонски авиолинии  Скопје – Софија и Охрид –Варна. Министерот Бектеши очекува двоцифрен раст на трговската размена ,а веќе се работи на олеснување на административните  царински процедури.

Заинтересирани сме за инвестирање и за набавка на струја од атомската централа во Белене, но се зависи од понудата, најави Бектеши.

Крешник Бектеши-министер за економија

,,Откако ќе имаме конкретна финансиска конструкција од бугарската страна и можноста на каков начин ние да учествуваме  во градбата на  тој енергетски капацитет, ние ќе донесеме одлука ,иако сме заинтересирани да ги разгледаме сите опции и ние како Влада да учествуваме во тој голем енергетски проект.“

Денешната  седница на меѓувладината мешовита  економска комисија  беше прва  по пауза од 10 години. Бугарија е шести надворешно трговски партнер на земјава, а лани биле тргувани производи и услуги  вредни 750 милиони долари.

Свето Николовски