Урнати два државни рекорди на уличната трка
10 км за 31 минута, трета Скопска трка, трета среќа за Дарио Ивановски. Во женска категорија најдобра беше србинката Теодора Симовиќ со време од 35 минути. Ивановски и Андријана Поп Арсова урнаа два државни рекорди. Се трчаше и штафета, два пати по 5 км. Повеќе од 2000 учесници од 24 земји беа дел од уличната трка Скопје трча.
Веќе докажаните тркачки имиња, велат дека трендот за трчање е на високо ниво.
...„ Задоволна сум од целата организација на трката, задоволна сум и од постигнатото време, втора во домашна конкуренција кај жените и уште една успешна градска трка. Со ова Скопје и воопшто тркачите покажаа дека се подигна трендот за трчање“, изјави Весна Кираџиева – маратонка
...„ Одлична патека, одлични услови за нас тркачите, задоволен сум од постигнатото време, но секогаш може подобро. Дека „Скопје трча“ е вистински бренд, докажаа и многубројните тркачи од земјите кои беа дел од оваа улична трка. За пример ќе ја земам Теодора Симовиќ, која е балканска првенка на 10к “, изјави Александар Кираџиев - маратонец
Спортскиот дух не ги напушта, трката за едни задоволство, за други мало разочарување. Организаторите задоволни од третото издание на Скопје трча 10км, очекуваат дека и во иднина оваа манифестација ќе остане традиција за главниот град, но се надеваат на уште поголема поддршка и нова градска трка во нашата земја.
Новинар: Анита Никушева-Јованчев