29- та Европска Конференција за Алцхајмерова болест

Здружението за Алцхајмерова болест- Македонија  во текот на целата година реализира активности за подигнување на свеста за предизвиците на луѓето со деменција и Алцхајмерова болест. Превентивно -едукативни предавања, постојани предавања на факултетот  “Трето доба”, издавање публикации,  посета на домови за стари лица и  учество на Светските Конференции, се само дел од заложбите за превенција и одложување на симптомите карактеристични за оваа болест. Од 23 до 25  октомври во Хаг се одржа 29 тата Европска Конференција за Алцхајмер, на која учествуваа и претставници од Националното здружение.

“Учеството на 29- тата Европска Конференција за Алцхајмер беше одлична можност за воспоставување нови контакти и разменување искуства и знаења со цел подобрување на квалитетот на животот на лицата со деменција и Алцхајмер во нашата земја. Бевме дел од неколку предавања и трибини, остваривме средби  со еминентни имиња од европските центри  за нега на лицата со Алцхајмер и со задоволство им ги пренесовме нашите искуства и достигнувања. По сето ова можевме да заклучиме дека сите ние што работиме на оваа проблематика , имаме направено многу за овие пациенти, но можеме да направиме уште повеќе.Сеќавањата се наша привилегија и затоа треба поактивно да се вклучиме во помошта на оние кои ги губат сеќавањата и способноста за помнење”, истакна д-р Драган Илијевски- Претседател на Здружението за Алцхајмерова болест- Македонија  

Алцхајмеровата болест и после многу години од поставувањето на првата дијагноза за неа е недоволно познато и истражено поле  за современата медицина. Условите за работа  во европските  центри за нега и грижа за пациентите со Алцхајмер се на многу повисоко ниво ,но сепак и кај нас се прават  интензивни напори за соодветна здравствена заштита  и поддршка на овие пациенти и на нивните семејства.

Јасмина Никова