Зајакнување на патронажната служба

Околу 130 млади лекари и медицински сестри во следните шест месеци ќе работат во патронажните и превентивните пунктови. 50 од нив ќе бидат ангажирани во метрополата. Од ресорот здравство велат, младите медицински лица ќе имаат можност да учат под менторство на искусни лекари. Ќе бидат ангажирани во вакциналните пунктови, во итната медицинска помош и во патронажните сервиси. По шест месечната работа овој медицински кадар ќе може да аплицира за редовно вработување.

„Лекарите на почетокот ќе бидат ангажирани во итната медицинска помош под надзор на ментор. А патронажните сестри ќе бидат прераспределени во патронажните и превентивните пунктови во Здравствениот дом Скопје во поликлиниката Чаир, Ченто, Бит Пазар, Драчево, Јане Сандански и во поликлиниката Ѓорче Петров“, изјави Виктор Исјановски – директор на Здравствен дом Скопје.

Ова е можност младите здравствени работници да бидат финансиски стимулирани и иднината да ја градат во земјава и искуството да го стекнат на почетокот на кариерата, додава министерот. Со зајакнување на патронажната служба, на граѓаните ќе им се олесни пристапот до здравствените услуги. 

„На овие патронажни сервиси ќе се приклучи и мобилната аптека. Се прави распоред во министерството за здравство за да можат пациентите особено хронично болните и потешко подвижните не само здравствената услуга, туку и лековите да ги добијат во домовите или блиску до своите домови“, изајви министерот Венко Филипче.

Филипче не се откажува од идејата јавно- приватно партнерство за брзата помош. Не сакаше да открие што покажала физибилити студијата, но тврди дека проектот бил исплатлив, и доколку се реализира граѓаните нема да имаат трошоци.

Андријана Атанасовска