Втора проекција на „Тајните архиви на Скопје“

Поради големиот интерес колажот „Тајните архиви на Скопје“ на 17 ноември ќе има втора проекција во Кино Култура. Целта на проектот „Тајните архиви на Скопје“ е зачувување и афирмација на материјалното и духовното современо културно наследство на градот Скопје.

Покрај зачувување на овие материјали како културно богатство на градот, но да им го претстави и доближи на младите генерации Скопје од пред неколку децении, за колажот од видеа, селектирани се материјали од десетина семејства.

Материјалите се од различен тип: родендени, свадби, прошетки, излети во и околината на Скопје. Колажот од видеа креира всушност лична, емотивна приказна за Скопје и Скопјани, раскажана низ четирите годишни времиња.

Како дел од проектот „Тајните филмски архиви на градот“ ќе бидат изложени и 54 фотографии. Фотографиите снимени во периодот од 70-те до 90-те години од минатиот век го отсликуваат Скопје и животот на скопјани во овие неколку децении.

„Тајните архиви на Скопје“ е проект на „Вардар Филм“ поддржан од Град Скопје.