Милевски призна вина за случајот „Рекет“, Јанева и Јовановски не се чувствуваат виновни

Зоран Милевски- Кичеец призна вина за кривичните дела за кои го гони Обвинителството во случајот „Рекет“. Прашан дали е свесен за последиците што ќе следуваат по ова признание на вина, како и дали некој му правел притисок, Милевски одговори: „Свесен сум за последиците и признанието го давам свесно без присила од никого“. Постапката во овој случај за него ќе се издвои.

Пред него, обвинетиот Бојан Јовановски- Боки 13 и обвинетата поранешна специјална обвинителка Катица Јанева, рекоа дека не чувствуваат вина за постапката за случајот „Рекет“.

Тројцата според обвинението побарале пари од бизнисменот Камчев за да го спасат од кривичен прогон во случајот „Империја“. Се товарат за примање награда за противзаконито влијание, а Јанева дополнително за злоупотреба на службената должност, додека Јовановски е обвинет и за перење пари и други приноси од казниво дело.

Рочиштето за случајот „Рекет“ денеска почна со задоцнување од 45 минути, бидејќи пред да биде донесен во судница, Јовановски бил на преглед кај затворскиот лекар. Пред судот рече дека не се чувствува добро, дека утрово десет пати повраќал, дека има желба активно да го следи судскиот процес, меѓутоа не е во состојба. Тоа го потврди и неговиот адвокат Дуковски.

Наспроти ваквите тврдења на одбраната, обвинителката Вилма Русковска беше децидна дека Јовановски сака само да ја одолжува постапката и дека може да го следи судскиот процес.

Лекарите од брза помош му дале дијазепам на Јовановски, по што констатирале дека може да го следи судењето.