Нема субвенции за возила според екостандарди, се работи на ново решение

Во Предлог- буџетот за следната година нема средства за субвенции за купување возила според екостандарди. Парите ќе одат за проекти што ќе дадат поголем ефект – изјави министерката за финансии Нина Ангеловска. Најави дека наскоро ќе биде соопштено повеќе за Законот за данок на моторни возила кој е усвоен од Владата, но и за други мерки за намалување на аерозагадувањето.

И министерот за економија Крешник Бектеши потврди дека претходно најавената мерка нема да се реализира затоа што имала лимитирачки фактор и требала да се спроведува по моделот прв дојден- прв услужен.

Не ги излажавме граѓаните, не се откажуваме од намерите да го обновиме возниот парк во државава, рече Бектеши. Се работи на ново решение и тоа ќе биде без финансиски последици за буџетот.

Министерството за економија следната година ќе располага со буџет од 591 милион денари. Најголем дел од поддршката е во делот на енергетиката, вели министерот Бектеши.

За субвенции за соларни колектори се предвидени 5 милиони денари, за ПВЦ и алуминиумски прозорци 25 милиони денари, за печки на пелети 30 милиони денари, за вградување на уред на алтернативни горива во возилата 20 милиони денари.

Сунчица Николоска