Чесен, ама сепак пораз на Македонија од Португалија

Иако му пружи солиден отпор на големиот фаворит и одигра добро прво полувреме, сепак репрезентацијата на Македонија за фудбалери до 21 година беше поразена на гостувањето кај Португалија со 2:0 во квалификациите за Европското првенство наредната година.

Нашите млади фудбалери предводени од одличниот Давид Бабунски беа рамноправен противник во првиот дел, но мечот го загубија за само осум минути. Во 51-та минута Бернардо Силва на додавање на Рикардо им донесе водство на Португалците коешто во 59-та го удвои токму асистентот за првиот гол. Блажевски го фаулираше Жоао Марио, а Рикардо од пенал ја осигура победата на Португалија којашто во 66-та минута промаши уште еден удар од 11 метри. Непрецизен беше Гонкало Пасиенсија.

Португалија остана лидер во групата 8 со максимални 15 бода од пет натпревари. Израел е втор со девет, додека третопласираната Норвешка има шест. Македонија со три порази и по едно реми и победа против Азербејџан е четврта со четири бодови. Исто толку, но послаба гол разлика има последнопласираниот Азербејџан.

Квалификациите за ЕП 2015-та во Чешка ќе продолжат на 23 мај кога Македонија ќе бара шанса за реванш за денешнит пораз од Португалија во меѓусебната пресметка во Скопје.