Мнозинството очекува нов предлог за технички министер за внатрешни работи, ВМРО-ДПМНЕ не отстапува
Мнозинството очекува од опозицијата нов предлог за технички министер за внатрешни работи. Според нив, зелено светло за Драган Ковачки ќе го доведе во прашање уставниот поредок на земјава. Според ВМРО-ДПМНЕ, армискиот полковник е вистински избор, бидејќи само професионалци на таа важна позиција може да бидат гарант за фер и демократски избори...
Познати се опозициските предлози за пополнување на местата во техничката влада. Од ВМРО-ДПМНЕ ја предлагаат Рашела Мизрахи за технички министер во ресорот труд и социјала, Гордана Димитриеска- Кочоска за дополнителен заменик- министер за финансии, Цветан Трипуновски во земјоделство и актуелната пратеничка Невенка Стаменковска за дополнителен заменик во Министерството за информатичко општество и администрација.
Договор сѐ уште нема за техничкиот министер за внатрешни работи. Од ВМРО-ДПМНЕ велат дека социјалдемократите не сакаат професионализам и затоа не даваат согласност со полковникот Драган Ковачки. Портпаролот Стоилковски не откри детали дали партијата има алтернативно решение.
Од владеачката коалиција велат дека е неуставно, воено наместо цивилно лице да раководи со Министерството за внатрешни работи. Според НСДП, дискусијата за претходни преседани е неодржива и несериозна, и го доведува во прашање уставниот поредок.
Предлогот на опозицијата претставува милитаризација на државата и нарушување на цивилната контрола врз безбедносните сили, изјави поранешниот министер за внатрешни работи, Павле Трајанов.
И власта и опозицијата уверуваат дека ќе се формира техничка влада во предвидениот рок и оти во април ќе се одржат изборите.
Миле Ристески