Рочиштето за „Рекет“ одложено за понеделник

Сѐ уште се болни бранителите на Јанева, па рочиштето за „Рекет“ се одложи до понеделник. Доколку не дојдат на расправата, Судот ќе ѝ назначи бранител по службена должност, бидејќи како што рече судечкиот судија, првообвинетиот Бојан Јовановски е во притвор и судењето не може да се одлага во недоголед.

Претходно во судницата Јанева имаше можност да избере дали ќе најде сама други бранители или судот да и одреди по службена должност, на што таа одговори дека си има бранители. Следуваше забелешка од судијата дека тие подолго време отсуствуваат, а Јанева рече судот сам да одлучи за нејзините бранители.

Поради одложувањето на рочиштето и неговата лоша здравствена состојба, речиси пред малигнитет, како што рече, Боки 13 побара судот да земе предвид дека 55 пати врз него се правени интервенции и дека тој не е експериментално глувче туку човек со право на живот.

На игнорантниот однос на судските власти спрема состојбата на неговиот клиент, се пожали адвокатот Дуковски. Тој посочи дека Јовановски е дискриминиран бидејќи единствено тој е во притвор од сите обвинети во случајот. Обвини дека носењето на Јовановски по лекари е само алиби дека ете нешто се презема за неговата состојба, но не и вистинска грижа за обвинетиот.

На рочиштето во судница по втор пат доаѓа обвинителката Лиле Стефанова, за да сведочи во оваа постапка. На предлог на обвинителката Вилма Рускоска, сведоци ќе бидат и други обвинители од СЈО. Досега сведочеше обвинителката Елизабета Јосифовска.

Фиљана Кока