Коронавирус: За 24 часа нови 3.000 заболени во Кина, расте бројот на жртви

Уште една болница експресно изградена и отворена во кинескиот град Вухан поради смртоносниот коронавирус кој усмрти над 360 луѓе, а зарази повеќе од 17.000. Хонгконг најави ново затворање на границата, а Русија ги прекинува сообраќајните врски со Кина.

„Ова ќе ни дозволи да ги депортираме странските државјани доколку се дијагностицира ова заболување, но и да спроведеме специјални рестриктивни мерки, вклучувајќи изолација и карантин“, изјави рускиот премиер Михаил Мишустин.

Од Кина со авиони се враќаат евакуираните европски државјани.

„42 патници се вратени назад, 32 од нив се турски државјани, меѓу кои има и луѓе од Азербејџан, Грузија и Албанија. Во согласност со упатствата од научниот одбор се преземени сите неопходни мерки, вклучувајќи и носење заштитни маски и одела за време на летот“, изјави Фахретин Коча, министер за здравство на Турција.

Светската здравствена организација предупреди- не сме подготвени за пандемија, потребен е нов систем.

„Еболата и Коронавирусот покажуваат дека постојниот бинарен систем е слаб инструмент за справување со сложени вонредни ситуации. Има зелено, црвено светло и ништо помеѓу нив. Сега ни треба жолто светло, нови механизми бидејќи двоецот „да/не“ не е соодветен. Тој е премногу ограничен и прост“, вели д-р Тедрос Аданом Генрејесус, генерален директор на СЗО.

Покрај човечките жртви, Коронавирусот и зададе силен удар и на економијата. Изолацијата на Вухан и уште 16 градови во провинцијата Хубеј засегна 50 милиони луѓе. Епидемијата во најнаселената земја во светот ги уништи и локалните бизниси, а со сериозни последици се соочува и туристичката дејност откако нагло се испразнија најпознатите локации. Азиските здравствени служби работат неуморно на зголемување на надзорот и превенцијата со цел да се избегне кошмарот со САРС кој усмрти многу луѓе и предизвика загуба од педесетина милијарди американски долари.

„Кинеската економска сила е значително подобра од 2003-та година. Имаме капацитет да ја добиеме битката против епидемијата. Способни сме да го минимизираме влијанието на епидемијата“, вели Лијан Ваилианг, заменик-директор на Комисијата за национален развој и реформа.

Кинеското МНР ги обвинува САД за предизвикување паника и хистерија. „Во глобализираниот свет, судбините на сите земји се поврзани, во време на здравствена криза треба да соработуваме и да ги надминеме проблемите, а не да ја спроведуваме стратегијата „помогни си себеси наштетувајќи му на другиот “, порача шефицата на кинеската дипломатија во денешното соопштение.

Маја С. Филдишев