Постигнат договор помеѓу ЈП ПОЦ, Општина Центар, Скопски Пазар и пазарџиите од Зелен Пазар

ЈП Паркинзи на Општина Центар следниот месец ќе го уреди „дивиот паркинг“ позади „Зелен Пазар“ кој моментално е во хаотична состојба и не е функционален ниту за жителите ниту за корисниците на услугите на Скопски пазар. На ова неуредено паркиралиште ПОЦ ќе постави нов систем за контрола на влезно-излезни рампи, односно, едниот дел ќе биде наменет за товарните возила на пазарџиите, а останатиот дел ќе биде резидентен паркинг за жителите од ул. „11 Октомври“ и  бул. „Кочо Рацин“.

Со отворање на ова паркиралиште, паркиралиштето „Аутомакедонија“ целосно ќе се ослободи од товарните возила и ќе им овозможи на жителите брз и лесен пристап до нивните домови. Постигнат е договор помеѓу ЈП ПОЦ, Општина Центар, Скопски Пазар и пазарџиите од Зелен Пазар, информираат од Општина Центар.

На средбата помеѓу градоначалникот на Општина Центар, Саша Богдановиќ и директорот на ЈП Паркинзи на Општина Центар, Васко Кичевски, со директорот на Скопски пазар АД Скопје, Младен Дамев и претставници на пазарџиите од „Зелен Пазар“ се разгледувале доставените барања од страна на пазарџиите, се разговарало за нови ефикасни решенија кои се во интерес и на жителите и на трговците од „Зелен Пазар“.

Општина Центар во координација со пазарна инспекција ќе ја преземе одговорноста за дивите пазарџии на паркиралиштето кај „Аутомакедонија“.