Спасовски: Oваа изборна кампања ќе биде една од „највалканите“ досега

Република Северна Македонија има капацитет да организира демократски, фер и слободни избори на кoи граѓаните ќе можат да одлучат по кој пат треба да оди земјата, вели премиерот Спасовски. Во интервју за „ЕУ Обсервер“ посочува дека очекува изборната кампања да биде една од „најавлакните“ досега.

Според Спасовски земјата има сили да се справи со тие закани и да организира слободни, фер и лигитимни избори.

„Сигурен сум дека оваа изборна кампања ќе биде една од највалканите во историјата на земјата. Сигурен сум дека лажните вести и медиумската пропаганда ќе бидат секојдневие за време на изборите“, истакнува Спасовски.

Прашан  дали очекува руско мешање во кампањата и исходот од изборите, Спасовски вели дека сите земји во Европа и во регионот се соочија со хибридни закани во процесот на нивното пристапување во НАТО и ЕУ. Но, државните институции се доволно силни и подготвени да обезбедат изборите да се одржат во нормални околности, истакнува Спасовски.

Тој ја повика ЕУ да донесе одлука за старт на преговорите за пристапување на земјата пред априлските избори.

„Направивме сѐ што беше побарано од нас и многу е важно да добиеме соодветна порака од ЕУ,  особено во март. Тајмингот е од огромна важност за нас со цел да се запре неизвесноста околу европската перспектива на Северна Македонија што може да се појави во земјата, но и во регионот“, оценува Спасовски.

Замрзнувањето на проширувањето на ЕУ и недонесувањето одлука за старт на преговорите во октомври лани придонесе за враќање на националистичката реторика во Северна Македонија. Октомвриската одлука, според него, беше стратешка грешка и придонесе за големо разочарување меѓу обичните луѓе.

Претстојните избори, вели, ќе бидат соочување меѓу проевропските и националистичките сили во земјата.