Обвинителството ќе ги провери наводите на министерот Чулев

Јавно обвинителство ќе ги проверува наводите на техничкиот министер за внатрешни Чулев, за наводно незаконско поништување од владата на решенијата за прераспоредување во МВР.

Ќе се утврдува дали има неправилности кои би упатиле на извршено кривично дело кое се гони по службена должност, информираат од Обвинителството. Надлежен јавен обвинител до владата поднесол барање за обезбедување на потребните податоци и писмени докази кои се однесуваат на наводите.

Скопското обвинителство ќе ја проверува и поднесената кривична пријава од дополнителниот заменик- министер Петровска против министерот Чулев за злоупотреба на службената положба и овластување и за несовесно работење во службата.

Пријавата е за телеграмата од 8-ми јануари годинава од страна на техничкиот министер со која се известуваат раководителите во МВР дека решенијата за распоредување потпишани од поранешниот министер Спасовски, не треба да им се врачуваат на вработените на кои се однесуваат.

Од техничкиот министер и од дополнителниот заменик- министер се бара да достават релевантни податоци и да приложат писмени докази. Во зависност од доставените податоци и докази, Основното јавно обвинителство ќе одлучи дали ќе поведе кривична постапка.