Запрен железничкиот сообраќај меѓу Италија и Австрија

Италијанските власти преземаат мерки за да се ограничи ширењето на коронавирусот во северниот дел на земјата, откако бројот на заразени порасна на 152 лица, а до сега починаа три лица. Откажан е карневалот во Венеција и низа спортски натпревари.

„Не сме во состојба на пандемија, но апсолутно е добро да се обидеме да избегнеме собири што овозможуваат ширење на вирусот. Затоа ги затворивме училиштата на 7, а можеби и на 14 дена. Суспендирани се секакви културни, рекреативни, спортски или верски собири, дури и на места затворени или отворени за јавноста“, изјави Џулијо Галера, регионален советник во Ломбардија.

Соседните земји разгледуваат мерки за заштита, откако Австрија вчера привремено го запре железничкиот сообраќај од Италија, а се разгледува и можноста да се затвори границата.

Во областа зафатена од вирусот живеат и околу 12 илјади македонски државјани. Најмалку 10 градови во покраината Ломбардија се поставени блокади на патот за да се спречи движење на луѓето. Во регионот не е дозволено ниту застанување на возови. Паралелно се дезинфицираат сите средства за јавен транспорт- автобуси, возови, дури и бродови во Венеција.

Италијанските власти сѐ уште не можат да го утврдат изворот на вирусот на северот на земјата.