Шилегов: Се одложуваат сите екскурзии на средношкоците во Италија

Сите екскурзии на средношколците од Скопје за Италија се одложуваат на неопределено време - соопшти градоначалникот Шилегов. Целта е да се спречи ширење на вирусот Ковид-19. До директорите на училиштата се издадени наредби да се придржуваат до препораките за превенција кои ги даваат надлежните институции.

„Во 23 средни училишта на Град Скопје учат околу 21.600 ученици и заштитата на нивното здравје претставува сериозна обврска и одговорност за нас како надлежна институција и за директорите кои раководат со училиштата. Согласно со задолженијата добиени од Владата на Република Северна Македонија, сите училишта своите планирани патувања и екскурзии во Република Италија ќе ги откажат или одложат на неопределено време. До крајот на оваа недела ќе биде одржан и едукативен час за превенција од вирусот согласно со препораките на Светската здравствена организација и Владата“, изјави градоначалникот Шилегов.

Тој нагласи дека денеска до директорите на средните училишта издал наредба раководните органи во училиштата внимателно да ги следат и целосно да се придржуваат на препораките за превенција и справување со коронавирусот кои ги даваат надлежните институции.