ССМ: Реализацијата на проектот за вработување млади е од големо значење

Секцијата на млади во Сојузот на синдикати на Македонија денеска организираше трибина на која претставници од Министерството за труд и социјална политика ги промовираа новите мерки за поттикнување на вработување на младите, влијанијата од истите и нивните очекувања. Претседателот на млади во ССМ, Лидија Наскоска појасни дека Сојузот на синдикати посебно секцијата на млади дава приоритет на борбата против невработеноста и потикнувањето на вработувањето за младите и истакна дека од големо е реализацијата на пакетот на мерки кои одат во насока на потикнување на вработувањето за младите.

 

 

Посочи дека целта е да се пренесат мерките до младите и што е можно повеќе да се применат каде што истите би добиле практична реализација. Новите мерките кои ќе им се презентираат на младите се однесуваат на вработување кај познат работодавач, мерката за практиканство и мерката за самовработување.

 

Виолета Димитриева од Министерството за труд и социјална политика појасни дека  мерките меѓу кои е и новата за практиканството, предвидува  три месеци практиканство и шест месеци субвенционирано вработување. Оваа мерка ќе им овозможи на младите до 29 години приоритет во вработувањето кај соодветниот работодавач.

 

Целната група која може да ги опфати овие мерки се околу 40.000 млади невработени до 29 години кои се наоѓаат на евиденција на Агенцијата за вработување, од кои 20.000 се активни баратели на работа а останатите се изјасниле дека се пасивни баратели.