Ковид-19 ги спречи печалбарите да се вратат дома

Пандемијата ги спречи многумината кумановците кои работат во воените бази во Ирак и Авганистан да се вратат дома. Тие од почетокот на кризата чекаат компаниите да им дозволат да го искористат своето право на одмор. Како е во моментов во еден од камповите, за МТВ раскажува, триесетгодишниот Немања Спасиќ кој, веќе седум месеци е во исчекување да се врати дома. Согласно договорот по секои три месеци поминати во база, има право на одмор.

„Сите летови досега беа откажани од и до Авганистан и немаме никакви информации кога ќе почнеме со ротација, одење на одмор. На секого му фали семејството, домашниот амбиент, другарите, ќе се слушнеш преку интернет, меѓутоа тоа е само мала утеха привремено. Некој од колегите имаше смртен случај и немаше никаква опција да замине дома во најтешките моменти кога требаше да биде таму, замислете само тоа колку е тешко“- вели Спасиќ.

Состојбата со ковид-19 дополнително го зголеми стресниот момент кај овие лица, оценуваат психијатрите. Градот неодамна беше шокиран од веста дека еден Кумановец посегнал и по својот живот не можејќи да ја издржи ваквата состојба. Престојот во воена база, одалеченост од семејството, посебниот режим на функционирање во ваква здравствена состојба, влијае врз овие лица и постои ризик да се јави посттрауматско растројство, објаснува психијатарот Богдановска-Тоскиќ.

„Во услови кога и дополнително имаме ограничување на движењето на слободата на избор каде да се престојува, што да се работи, можат и да доведат до вакви последици односно до отворање на големи егзестенцијални прашања каде што анксиозноста е неподнослива и веројатно таквата индивидуа веќе ги исцрпела сите свои психолошки одбранбени механизми и се решила на еден трагичен чекор“- вели психијатарот Богдановска- Тоскиќ.

Психијатрите оценуваат дека е многу важно по враќањето од воените подрачја печалбарите да побараат помош и совет.

Елена Георгиевска