Груевски осуден година ипол затвор, Јанакиески доби условна казна за „Насилство во Центар“
Условна казна затвор за екс-министерот за транспорт и врски, Миле Јанакиески и другите обвинети во случајот „Насилство во Центар“. Поранешниот премиер Груевски е осуден на затворска казна од една година и шест месеци затвор. Обвинителството најави жалба...
Една и пол година казна затвор доби поранешниот премиер Никола Груевски, а условна од една година екс- министерот за транспорт и врски Миле Јанакиески за поттикнување на насилствата пред Општина Центар во јуни 2013-та година.
Условна судијата Јосифовски им изрече и на извршителите на насилството пред Општина Центар. Девет месеци на Александар Трајковски, Дарко Стојчевски, Трајче Петковски, а шест месеци за обвинетите Даниел Трифуновски и Игор Бошковски.
Обвинителката Фатиме Фетаи најави жалба, за како што рече висината на казните. Смета дека судот ги преценил олеснувачките околности на сметка на отежнувачките. Жалба најави и адвокатот на Миле Јанакиески.
Обвинителството на минатото рочиште се откажа од гонење за лицата Даниела Рангелова, Милан Андоновски и Борче Богдановски. Претходно за случајот вина признаа Томислав Лазаров и Јордан Ристевски и добија условни казни.
Наташа Гркова- Петрушевска