Законот за заштита од заразни болести пред пратениците на 27-ми октомври
Законот за заштита на населението од заразни болести во кој се владините мерки за Ковид-19 на седница на 27-ми октомври. Претседателот на Собранието, Џафери вели дека нема намера да свика посебна пленарка само со една точка. Потсети дека одложувањето на расправата било по барање на партиите...
Измените и дополнувањата на Законот за заштита на населението од заразни болести, ребалансот на Буџетот и Законот за заштита од дискриминација се очекува да бидат на дневен ред на собраниската седница закажана за 27-ми октомври.
Претседателот на Собранието Талат Џафери денеска на средба со новинарите изјави дека пратеничките групи побарале законот да не биде ставен на седницата на 20-ти овој месец за да се усогласат за одредени прашања. Но, Џафери истакна дека поради разногласието на партиите нема намера да свикува седница само за една точка на дневен ред по скратена постапка и ги информирал дека наредната седница ќе биде на 27-ми октомври.
На седницата на 27-ми, доколку се постигне договор меѓу парламентарните партии би можело на дневен ред да биде и избор на Уставен судија.
До седницата се очекува да заврши изолацијата на тројцата пратеници кои беа позитивни на Ковид-19. Според Џафери, тие се во добра здравствена состојба.