Уште еднаш победнички императив пред МЗТ!

Трката со Игокеа за шестата позиција во Јадранската лига повторно го става под принуда МЗТ Скопје. Особено што во 24-то коло македонскиот првак ќе игра пред своја публика против Широки, екипа што и во оваа сезона е на дното. Тимот од Аеродром има биланс 11-12, па со очекуван триумф во арената „Борис Трајковски“ ќе дојде до половично остварување во пресрет на завршните два меча, гостувањето кај Црвена Звезда и пресметката пред своите навивачи со Раднички.

Тековната рунда од АБА друштвото може да има двојно значење за МЗТ Скопје. Ако се остварат плановите против Широки, а доколку Игокеа загуби од Цибона в понеделник, тогаш нашиот состав ќе има идентичен ефект со екипата од Лакташи, со којашто веќе оствари превласт со успеси во двата меѓусебни дуела. Но сепак, вистинскиот пристап е „чекор по чекор“. Првиот е триумф над Широки во натпреварот што ќе почне во 19 часот. Преносот е на Првиот канал на Македонската телевизија.