Заштита на имунитетот, но да не се претерува
Во битката со корона вирусот најбитен е имунитетот. Стравот ги мотивира граѓаните да го штитат имунитетот, но и да претераат. Се чита ,се купува и се применува и повеќе отколку што треба. Граѓаните се главно за природна заштита, а лекарите за контролирана употреба затоа што неконтролираното земање препарати е штетно за здравјето...
Минерали, витамини Ц и Д, цинк, селен, мед, прополис, чаеви. Граѓаните максимално се обидуваат да се заштитат од корона вирусот, да го зајакнат имунитетот. Граѓаните се категорични - многу е битно „битката“ да се води со природните продукти и состојки.
Стравот лозје чува вели старата поговорка, ама може и да доведе до претерување. Сѐ што ќе се прочита или чуе, мора да се примени. Во аптеките, велат - се купува сѐ што треба и не треба. Заборавениот витамин Д едноставно воскресна.
„Граѓаните дури и на своја рака сакаат да купат антибиотици, но ние сме тука да ги спречиме. Д витаминот воопшто, беше заборавен“, вели Ане Јанеска, фармацевт.
Граѓаните сфаќаат дека се претерува за заштитата на имунитетот. Стравот преовладува, ама скапа е и природната заштита.
За корона вирусот нема лек. Ама, одредени студии препорачуваат витамини и минерали. Но, потребни се контролата, и непретерувањето, велат матичните лекари.
„Треба да се применуваат на краток рок, а не постојано, бидејќи може да има и контра ефект“, вели Нора Тасеска, матичен лекар.
Заштитата на имунитетот е пресудна, ама, прво, консултација со лекар.
Елизабета Митреска