Училиште во Куманово стана државен центар за стручно образование

Кумановското училиште „Киро Бурназ“ по одлука на Владата премина во државно средно училиште, односно регионален центар за стручно образование и обука за Североисточниот плански регион. Во центарот,  заинтересираните ќе имаат можност за доквалификација, преквалификација или валидација на формалното и неформалното образование. По завршување на обуката лицата ќе добијат соодветен сертификат, и на тој начин ќе станат поконкурентни на пазарот на труд.

„Во момент кога некоја фирма ќе има потреба од одреден кадар ќе дојде ќе се обрати кај нас и ние ќе имаме можност  да направиме скратена програма со скратена обука и за многу кратко време да добијат соодветен кадар кој што ќе им треба“, изјави  Весна Трајковска, директор на училиштето „Киро Бурназ“.

Очекувањата се новиот центар да обезбеди поефикасно и поефективно образование и да продуцира квалитетен кадар. Можност да се едуцираат ќе имаат ученици, возрасни и  наставници.

„Ќе имаме можност и за валидација, тоа значи дека ако некој веќе долго време работи некое занимање за кое нема завршено соодветно образование и документ, диплома, свидетелство, во нашиот Регионален центар ќе може да се изврши валидација на тоа веќе што тој го работи и потоа соодветно да си аплицира во фирма и да биде така платен“, вели Трајковска.

За оваа цел е планирана и целосна реконструкција на училиштето, но ќе се стави во употреба и Ученичкиот дом, кој не функционира од 2001 година. Училиштето ќе добие и современа опрема, не само за профилите за Регионален центар, туку и за сите останати за формалното образование.

Елена Георгиевска