Програмата за имунизација во завршна фаза

Здравствените власти сѐ уште го подготвуваат планот за имунизација против коронавирусот, а првите вакцини се очекува да пристигнат на почетокот од идниот месец. Велат, програмата за вакцинација е во завршна фаза и ќе планирана според искуствата на западните земји кадешто веќе се спроведува. Следната недела надлежните ќе ги информираат граѓаните на кој начин ќе се одвива процесот. Она што е познато е дека имунизацијата ќе се извршува во постоечките вакцинални пунктови со закажување преку „Мој термин“.

„За вакцинација на граѓаните ќе се користат постоечките вакцинални пунктови во здравствените домови низ државата, болници и други здравствени капацитети, бидејќи таа инфраструктура е добро поставена и функционира. Секој здравствен дом има назначено одговорно лице за координација и организација на Ковид-19 вакцинацијата“, велат од Министерството за здравство.

Засега нема податоци за спроведени анкети меѓу граѓаните за вакцинирањето. Најавени се кампањи за важноста и за безбедноста на имунизацијата против ковид што ги подготвуваат здравствените власти.

Први ќе се вакцинираат здравствените работници, потоа хронично болните и луѓето во домовите за стари лица.

Американската вакцина на компанијата „Фајзер“ ќе биде прва достапна во земјава. Потоа треба да дојдат на „АстраЗенека“. Предвидено е да се вакцинира 60 насто од популацијата, или 1,2 милиони граѓани со што се создава колективниот имунитет.

Андријана Атанасовска