Вакцините се безбедни и сертифицирани, имунизацијата ќе почне во февруари

Граѓаните во земјава нема да имаат можност да изберат дали ќе се вакцинираат со дозите на Фајзер, АстраЗенека или руската Спутник. Здравствените власти уверуваат – сите вакцини против ковид коишто ќе пристигнат во земјава ќе бидат безбедни и сертифицирани. Имунизацијата ќе почне во февруари. Првите дози ќе бидат од американскиот производител Фајзер.

„Можно е некои од земјите со кои разговараме, а тоа се Австрија, Бугарија, Полска и Грција најконкретно да одделат некоја количина од своите, но јасно ни укажуваат на тоа дека главен проблем и зошто тоа досега не беше направено, како еден најавен механизам од страна на Европската комисија на солидарност, не само со нашата земја, туку и со другите држави што не се членки на ЕУ, е во количината што ја добиле. Значи, значајно помала, некаде десетина од планираната за нивните земји“, изјави министерот за здравство, Венко Филипче.

„Оваа вакцина се користи за итна вакцинација, а не како другите регуларни вакцини кои доаѓаат на пазарот. Тоа значи дека е потребно многу внимателно следење и проучување од страна на Владата, за да се обезбеди дека се применува вистинската вакцина“, изјави Џихан Тавила – шефица на канцеларијата на СЗО во земјава.

Први ќе бидат имунизирани здравствените работници кои работат во ковид- центрите и граѓаните над 70 години со ризични заболувања. Втори ќе се вакцинираат здравствените работници со помал ризик и пациентите со хронични заболувања.

Филипче вели, во земјава не е регистриран подвид на вирус како оној во Велика Британија што се прошири во 50 земји.

Од 21-ви јануари, Филипче најави враќање на работното време на угостителите до 21 часот, останатите мерки за превенција од коронавирусот остануваат во сила.

Андријана Атанасовска