Богојавление- Водици одбележан со светa литургиja во црквите
Годинава Водици одбележан само со света литургија во црквите. Поради пандемијата, изостана традицоналното положување на крстот во осветените води. „Нашиот живот да го красат човекољубието и богољубието, зашто не можеме да го љубиме Бога, а да ги мразиме луѓето“, рече поглаварот на Македонската православна црква- Охридска архиепископија г.г. Стефан...
Православните христијани денеска го празнуваат Богојавление. Годинава Водици поради пандемијата одбележан без традиционалните масовни собири и спуштање на светиот крст во водите.
За прв пат во последниве 30 години, Водици се празнува без положување на светиот крст во реките и езерата. Вековната традиција ја прекина пандемијата со корона вирусот.
Наместо тоа, свештениците извршија водосвет во црквите, а потоа ги осветија водите на реката Вардар. Верниците со свеќа в раце се помолија за здравје и бериќет. Велат, иако годинава Водици се празнува без обичаите, традицијата мора да се почитува. Рано наутро во црква, на литургија.
Празникот Богојавление, всушност ги објаснува сите други празници и настани. Ја објаснува целта на Христовото доаѓање како син божји. Крштевајќи се во реката Јордан тој ни дал и пример и заповед за потребата од Светата тајна крштение, рече на Светата божествена златоустова литургија Архиепископот охридски и македонски г.г Стефан.
Христијанството значи и духовно раѓање, односно почеток на човековото живеење во верата. Со Водици завршуваат не само 12 таканаречени некрстени денови, туку и циклусот зимски празнувања во кои спаѓаат и свеченостите поврзани со Бадник, Божик и Василица.
Александра Спировска