Пристигнаа првите вакцини против Ковид-19

Пристигнаа првите антиковид вакцини. Се работи за пратка од 4.680 вакцини од производителот „Фајзер“, кои ги обезбеди Република Србија. Примопредавањето се изврши на граничниот премин Табановце, во присуство на делегација од Србија предводена од претседателот Александар Вучиќ. Нив ги пречека премиерот Зоран Заев.

„Пакетот од 4.680 вакцини од вкупно 8.000 вакцини е израз на пријателска и соседска подадена рака за поддршка и прва помош за македонските граѓани додека стигнат вакцините што ние ги нарачавме. 2020 година беше една од најтешките години во поновата историја на човештвото ништо не е завршено и во оваа година, и останува и понатаму да бидеме крајно внимателни“, истакна премиерот Заев.

Пратката од Србија требаше да пристигне пред неколку дена, но беше одложена поради усогласување на техничка документација.

„Среќен сум што ова го направивме, можевме и пред неколку денови но имавме проблем со добивање дозвола за извоз, затоа што се строги процедурите во Фајзер. Се надевам дека оваа количина ќе биде доволна за лекарите во ковид центрите, кои се најзагрозени“, изјави српскиот претседател Вучиќ.

Министерот, Венко Филипче информираше дека Министерството за здравство е подготвено да ги преземе вакцините, а имунизацијата треба да започне во среда во Клиничкиот центар во Скопје.

Пристигнатите вакцини од граничниот премин Табановце со придружба на полициски возила се пренесени во Скопје. Деновиве се очекува да започне и имунизацијата.

Покрај оваа пратка се очекува во државата деновиве да пристигнат 200 илјади дози вакцини од Кина.

Елена Георгиевска