Светот обединет во одговор на пандемијата со Ковид-19

Апелите за брза и безбедна имунизација ги обедини државите на глобално ниво во одговор на пандемијата. Австралија објави дека в понеделник почнува со вакцинација со „Фајзер“. На луѓето над 80 години, здравствените работници и на карантинскиот персонал ќе им биде даден приоритет.

„Секоја држава и територија ќе биде опфатена. Мора да се почне од некаде и да се заврши со овој процес. Наша цел е да ги вакцинираме жителите на Австралија што е можно посигурно и побрзо“, изјави Грег Хант,  министер за здравство на Австралија.

И Венецуела почнува кампањата за имунизација. Претседателот Мадуро најави дека првите 100 илјади дози на руската вакцина Спутник-5 идната недела ќе ги примат медицинските лица.

„Ја одобривме вакцината Спутник затоа што нашите научни испитувања ја потврдија нејзината целосна безбедност. Во првата фаза ќе го вакцинираме целиот медицински и здравствен персонал“, рече Мадуро.

Вакцинацијата е во тек и во САД.  Во Пентагон се загрижени бидејќи третина американски војници не се согласуваат ја примат вакцината.

„Во наш интерес е да бидеме што е можно отворени и транспарентни. Тоа е доброволна вакцина. Луѓето сами одлучуваат дали сакаат да ја примат вакцината или не“, вели Џон Кирби- портпарол на Пентагон.

Според последните статистики на ЕУ со околу 33 милиони дози вакцини се имунизирале 22 милиона со една доза, 7 милиони луѓе со две дози. Во моментов, во ЕУ одобрени се три вакцини: „Фајзер/Бионтек“, „Модерна“  и „АстраЗенека“. Европската комисија потпиша договори за набавка со „Џонсон и Џонсон“, „Санофи-ГСК“ и „Кјурвак“. Амбициозните планови на Брисел се дека до средината на септември, околу 70% од европејците ќе бидат вакцинирани.

Маријана Димовска