МРТ и БНТ потпишаа меморандум за разбирање

Размена на вести, детски, музички, забавни, културни и образовни програми- Македонската Радио телевизија и Бугарската Национална телевизија потпишаа меморандум. Се обврзаа на реципрочен начин да разменуваат различни телевизиски програми. Целта е да се развиваат пријателски односи и заемно корисна билатерална соработка.

„Ќе продолжиме да правиме размена на програми од областа на туризмот, културата, образованието, музиката, на дневни информации и на вести. Ние, наскоро сакаме да отвориме и дописништво во Софија, се надевам дека и БНТ ќе отвори дописништво во Скопје, во Македонија, така што на еден заеднички начин да успееме да ги доближиме телевизиите што е можно поблиску“, изјави директорот на МРТ, Марјан Цветковски.

Се надеваме дека ќе започнеме да работиме поактивно, за да можат двата народа да се запознаат- вели директорот на Бугарската Национална телевизија. Додека политичарите се занимаваат со политика, историчарите со историја, ние правиме телевизија, изјави Емил Кошлуков.

„Ова е договор со Македонската јавна телевизија, со кој се надеваме дека ќе започнеме да работиме поактивно, да размениме содржини меѓу нашите две телевизии. И додека политичарите се занимаваат со политика, историчарите со историјата, ние правиме телевизија. Можеме да прикажеме убави извештаи за Македонија, за Охрид, има толку убави места, и тие можат да гледаат репортажи за бугарски места. Може да има македонска музика и фолклор, можеме да им ги дадеме нашите за да можат двата народа да се запознаат и слушнат. Мислам дека ова е патот“, нагласи директорот на БНТ, Емил Кошлуков.

Со потпишувањето на меморандумот со БНТ, Македонската телевизија ја продолжува соработката со јавните сервиси од регионот.

Сунчица Николоска