Охрид: Со брод за спасување ќе се зголеми безбедноста во пловидбата

Големиот број на пловни објекти и се поактивната пловидба во водите на Охридското Езеро го зголемува ризикот од потонувања, пожари и други хаварии. Поради тоа експертите сметаат дека е неопходно да се активира пловило кое 24 часа ќе се грижи за безбедноста на вода. Тоа беше причината ЗДружението „ЕКО ФАП“ да излезе со идејата еден брод кој веќе не е во комерцијална употреба да биде преуреден во брод за трагање, спасување и давање на помош при пожари на пловни објекти, но и на непристапни места долж крајбрежјето. Идејата е бродот „Илинден“ да се ревитализира и пренамени бидеќи ги има сите неопходни карактеристики за справување со такви предизвици.

„Габаритите и неговите маритивни способности и пловни својства даваат прекрасни можности да биде преуреден за оваа намена, односно на себе да има една пумпа која што веќе ја имаме која ќе ги снабдува противпожарните единици со вода. Понатака не само тоа, бродот ќе има свој радар , светла за трагање и спасување во ноќни услови“, изјави Горан Устијаноски, капетан на Охридската капетанија.

Во здружението сеуште ги прават пресметките колку ќе чини реконструкцијата и очекуваат да добијат подршка од државата.

„Моментално го имаме најголемиот капитал, а тоа е човечкиот фактор. Во овој дел не зависиме од никаква условно речено интелектуална, ниту странска помош, ниту од други експерти од надвор од нашето здружение. Се она што е потребно како интелектуална сила, како мајсторска сила ние го имаме до нас, односно ние самите сме докажани во тој дел и ќе го истераме тоа на најсолиден начин“, вели Устијаноски.

Откако бродот ќе профункционира според планираното посадата ќе го опслужува волонтерски, а доколку надлежните проценат дека идејата е навистина добра и прогресивна ќе се бараат модалитети за постабилно финансирање.

Сашо Нелоски