В среда почнува вакцинацијата на граѓаните, во април се очекува поголема пратка вакцини

20 илјади граѓани на возраст над 75 години се пријавиле за имунизација против коронавирусот. Тие ќе бидат првите кои ќе ја примат вакцината на „АстраЗенека“. Преку матичните лекари ќе добијат термин во кој пункт и во кое време од среда ќе бидат боцнати. Вакцината се доставува и во останатите градови. Тимовите од здравствените домови се подготвени.

„Подготвени се и здравствените работници и пунктовите. Вакцинацијата во оваа фаза е предвидена за старосната група над 75 години, па над 70 години, како и остатокот од здравствените работници кои треба да ја примат втората доза од Спутник вакцината“, вели д-р Соња Ралева, Здравствен дом – Скопје.

Април ќе биде месец кога се очекува да пристигнат повеќе вакцини- тврди министерот за здравство Филипче. За масовната имунизација се подготвува спортската сала „Борис Трајковски“. Предвидено е таму вакцинацијата да се спроведува на 30 позиции.

Министерот Филипче иако најави дека меѓу првите ќе ја прими вакцината на „АстраЗенека“, сепак вели ќе почека да стигнат повеќе дози.

Ревакцинацијата со вакцината „АстраЗенека“ е за три месеци.

Со 24 илјади вакцини од „АстраЗенека“, произведени во Јужна Кореја, в среда ќе започне имунизација на граѓаните во земјава. Според здравствените власти, приоритет за имунизација ќе имаат лицата над 75 години и хронично болните.

В среда освен граѓаните над 75 години, во пунктот „Јане Сандански“ ќе започне и ревакцинацијата на здравствените работници со руската вакцина„ „Спутник“.

Андријана Атанасовска