Србија донираше 20.000 вакцини од „Спутник“, се очекуваат уште дополнителни 20.000
Во земјава пристигнаа 20 илјади дози „Спутник“, нова донација од Србија. Дополнително треба да пристигнат уште 20.000. Србија претходно ни донираше и 8.000 вакцини од „Фајзер“, со кои се вакцинираше медицинскиот персонал. Со донацијата ќе се овозможи континуитет во имунизацијата додека да пристигнат вакцините што земјава ги има нарачано, посочија премиерот Заев и министерот Филипче...
Во земјава пристигнаа нови 20.000 дози од вакцината „Спутник“, донација од Србија. Уште 20.000 дози ќе пристигнат дополнително и ќе бидат наменети за ревакцинација. Со ова започнатиот процес на вакцинација во земјава ќе продолжи без застој, изјавија премиерот Заев и министерот Филипче. Шефот на Владата изрази благодарност за донацијата од пријателска Србија, којашто доаѓа во критично време додека се чекаат нарачаните вакцини преку Ковакс системот, ЕУ и директно од производителите.
Министерот за здравство Филипче најави дека со преостаните 5.000 вакцини „АстраЗенека“ и со вакцините „Спутник В“ ќе почне вакцинација и на лицата под 77 години. Според него, имунизацијата се одвива добро, а подготвени се пунктови и за помасовна вакцинација на граѓаните.
Заев апелираше до сите граѓани да се пријават за вакцинација за што побрзо отворање на државата и враќање на нормалниот живот. Рече дека и тој и другите министри ќе чекаат да им дојде редот за вакцина, согласно планот за имунизација на населението. Негираше дека некои владини функционери се вакцинирале преку ред.
Ирина Гелевска