Вархеји: ЕУ обезбеди 650.000 вакцини „Фајзер“ за Западен Балкан

Европската унија ќе испорача 650 илјади дози од вакцината „Фајзер“ на шесте земји од Западен Балкан. Со нив ќе бидат имунизирани здравствените работници и најранливите групи. Вакцините ќе се дистрибураат од мај до август. Од оваа количина, кај нас се очекува да пристигнат 119.600 дози. Вакцините ќе ги достави Австрија, која го координира системот за споделување вакцини со регионов. Во изминатиов период Европската унија беше мета на критики поради тоа што не го вклучи Западен Балкан на исто ниво со земјите- членки на Унијата.

„И покрај сегашниот глобален недостиг, ЕУ ќе достави вакцини за спасување животи за Западен Балкан. Обезбедивме поддршка од почетокот на пандемијата со Ковид-19: прво, со итна медицинска опрема, сега ќе помогнеме да се обезбеди вакцинација на сите медицински работници кои се на првата линија низ целиот регион, како и на некои од другите ранливи групи. Ние се грижиме за Западен Балкан чија иднина е во Европската унија“, изјави Оливер Вархеји, еврокомесар за проширување.

Вицепремиерот за европски прашања, Никола Димитров со оценка – благодарни сме за поддршката и за солидарноста, имајќи го предвид глобалниот предизвик за обезбедување вакцини.

Во земјава пристигнаа и 10 илјади дози „Фајзер“ кои здравствените власти ги набавија во директни преговори со производителот, а втората пратка исто така од 10 илјади вакцини се очекува идната недела. Во истиот период најавено е дека треба да добиеме околу 76 илади дози „Астра Зенека“ преку Ковакс механизмот.

Досега во земјава се вакцинирани повеќе од 40 илјади граѓани, а над 180 илјади изразиле интерес за имунизација.

Андријана Атанасовска