30- дневен притвор за Рашковски, спроведен е во затворот во Шутка
Кривичниот совет на Одделението за организиран криминал и корупција постапувајќи по жалбите од Обвинителството за куќниот притвор за поранешниот генерален секретар на Владата, Драги Рашковски и сопственикот на „Инвока“ Даниел Станчев, го преиначи решението на судија на претходна постапка и на двајцата место куќен им изрече 30 дена затворски притвор, информираат од Основен кривичен суд- Скопје...
Поранешниот генерален секретар на Владата, Драги Рашковски, доби 30- дневен притвор кој треба да го издржува во затворот Шутка. Кривичниот совет во Основниот кривичен суд- Скопје ја прифати жалбата на Обвинителството за гонење организиран криминал и корупција.
Кривичниот совет го преиначи решението на судија на претходна постапка и на осомничениот, место куќен му изрече 30 дена затворски притвор, информираат од Основен кривичен суд- Скопје. Од Кривичен соопштуваат дека е прифатена и жалбата за сопственикот на „Инвока гроуп“.
На 16-ти април на Рашковски и второ осомничениот Станчев, сопственик на компанијата им беше одредена мерка куќен притвор.
Обвинителството истрагата ја отвори во четвртокот, на 15-ти април, во петокот Рашковски и Станчев беа изведени пред судија на претходна постапка. Кога им се определи мерка куќен притвор, обвинителката Ивана Трајчева најави дека ќе поднесе жалба, бидејќи постои опасност од бегство и влијание на сведоци.
Рашковски се товари за случај во кој злоупотребил државни пари и набавил софтвер за МВР.
Дијана Ценевска