После 10 години башиноселци за прв пат задоволни од откупната цена на младиот кромид

Башиноселци, најголемите одгледувачи на млад кромид во Македонија, годинава се задоволни од откупната цена. После десетина години, оваа, за прв пат се пофалија дека раноградинарскиот зеленчук, и кромид и лук се на цена. Производителите на одгледување работеа девет месеци и време е да го наплатат нивниот труд. Откако започна откупот, цената е 300 денари за врзоп, што одамна се нема случено.

Годинава за прв пат, после 15-тина, немаше организиран откуп на младиот кромид за пазарот за Хрватска. Дали причината е што католичкиот Велигден годинава беше рано, на 1-ви април, но во март месец ниту еден камион не дојде и не замина, со зеленчукот за пазарите во Загреб. Но и покрај тоа, годинава тој има цена. Причината е што поради ниската цена претходните години, повеќето одгледувачи оваа засеале далеку помали површини.

Башино село има околу 250 куќи со илјада жители и секој дом, без исклучок одгледува млад кромид. Разбирливо е штом влезете во селото, мириса на овој зеленчук. Цели фамилии работата на него, го корнат, чистат, перат, пакуваат, тоа е фамилијарен бизнис.

Петар Печков