Почетокот на пристапните преговори во фокус на средбите на Пендаровски во Брисел

Шефот на државата Стево Пендаровски на средбите во седиштето на ЕУ во Брисел ја отворил темата за почеток на пристапните преговори. На средбата со високиот претставник на ЕУ за надворешна и одбранбена политика Жозеп Барел, претседателот Пендаровски истакнал дека Северна Македонија покажа политичка зрелост и максимален фокус на остварувањето на европската перспектива и дека евроинтеграцијата е во интерес на стабилноста, безбедноста и просперитетот на целиот регион.

Пендаровски побарал ЕУ да ја забрза својата улога што позитивно ќе се одрази на севкупните политички процеси и реформите. На средбата со претседателот на Европскиот парламент Дејвид Сасоли, шефот на државата посочил дека усвојувањето на преговарачката рамка и одржување на првата меѓувладина конференција во најскоро време е наш клучен приоритет.

Претседателот Пендаровски и еврокомесарот за проширување Вархеји ја посочиле важноста од скорешно одржување на меѓувладината конференција и официјален почеток на пристапните преговори во рамки на европските состаноци во мај и јуни годинава.

Вархеји и Пендаровски разговарале за добрососедските односи и надминување на проблемите со Бугарија која стави вето на евроинтеграцијата.

Шефот на државата се заблагодарил за поддршката од ЕУ со економско-инвестицискиот план за Западен Балкан и донацијата од 119 вакцини „Фајзер“, со што ќе се забрза вакцинацијата во земјава.

Ирина Гелевска