Конкурс за најголем придонес за животната средина

Градот Скопје распиша јавен конкурс за избор на најеколошка компанија, најголем придонес во областа на заштитата на животната средина, најубаво уреден двор на куќа, зграда и стопански објект и најубав состав и цртеж на тема екологија за учениците од основните и од средните училишта.

 

Конкурсот е дел рамките на традиционалната манифестација „Денови на пролетта - Денови на екологијата, а пријавувањето започнува денеска и ќе трае до 15 мај годинава.

 

Целта на конкурсот, е да се промовира и популаризира грижата за животната средина и за природата.

 

Пријавите на заинтересираните граѓани, невладини организации, јавни установи, претпријатија и други правни и физички лица може да се достават по пошта на адресата: Град Скопје-Сектор за заштита на животната средина и природата, булевар Илинден, број 82, или во архивата на Градот, како и на телефонските броеви 02/3297-273 и 3297-302.

 

За првите две категории, предвидена е по една награда во износ од по 45.000 денари.

 

За третата категорија, најубав двор, предвидени се три награди (за индивидуално домување, за колективно домување и за институција, фирма или стопански објект), во износ од по 40.000 денари.

 

За четвртата категорија се предвидени две награди, една за ученици во основните училишта и една за ученици во средните училишта, во износ од по 10.000 денари.

 

За петтата категорија се предвидени две награди, една за ученици во основните училишта и една за ученици во средните училишта, во износ од по 10.000 денари.

 

Разгледувањето на пристигнатите пријави и одбирањето на кандидатите го врши соодветна комисија, која Градот Скопје ја формира од претставници на вработените во секторите на Град Скопје и од невладините организации.

 

Пријавувањето започнува веднаш и трае до 15 мај 2014 година, а прогласувањето на добитниците во сите категории ќе се одржи на 5 јуни.