Заев се вакцинираше со „Синофарм“, продолжува масовната вакцинација

По примената прва доза од кинеската вакцина „Синофарм“ премиерот Заев се чуствува добро, вели ја извршил граѓанската должност. По имунизацијата ќе ја продолжи работната агенда во попладневните часови. Очекува до почетокот на летото висок процент на имунизирано население, а со тоа да се смени епидемиолошката состојба во земјава. Ги повика граѓаните да се пријават за имунизација, тоа е единствениот начин за заштита од коронавирусот.

„Вакцините се безбедни, проверени, тестирани и навистина колку побрзо заврши процесот на имунизација толку побрзо ќе заврши борбата со овој невидлив непријател, пандемијата од Ковид-19. Важно е масовно да се учествува во процесот за имунизација за да се промени целокупната слика на епидемијата во позитивна смисла и полека да го постигнеме колективниот имунитет“, нагласи премиерот Заев.

Повеќе од 250 илјади граѓани изразиле интерес за имунизација преку сајтот „вакцинација.мк“. Досега вакцина и ревакцина примиле над 92 илјади граѓани. 25 насто од населението над 70 години ја примиле првата доза вакцина.

„Очекувам подобрување на целата ситуација, да се заврши што побрзо оваа пандемија и да можеме повторно да се вратиме на нормалниот живот.“

„Заштита на сопственото здравје и на фамилијата.“

„Обезбедување, сите стравуваме од коронава“- велат граѓаните што ги анкетиравме.

Од Министерството за здравство укажуваат- интересот за вакцинација секојдневно се зголемува. Според националниот план, во моментов имунизацијата се спроведува кај возрасните лица, граѓаните што се пријавиле преку веб апликацијата, како и вработените во критичната инфраструктура.

Андријана Атанасовска