Вонредна состојба во градот Лод по бунтот на израелските Арапи

Израел прогласи вонредна состојба во градот Лод по бунтот на израелските Арапи откако ескалираше судирот со Палестинците. Во насилствата беа повредени десетина лица, а демонстрантите опожарија и многу возила и неколку синагоги. Израелскиот премиер Нетанјаху порача – Хамас и исламскиот џихад ќе платат уште повисока цена поради нивната агресија.

-Хамас ќе добие удар каков што не очекува, знам дека за ова е потребно трпение и одредена жртва од ваша страна, граѓани на Израел. Имам и збор-два за Арапите во Израел. Вчерашниот дивјачки напад од млади луѓе е неприфатлив. Ќе сториме сè за да ги зачуваме редот и мирот, изјави Бенјамин Нетанјаху, Премиер на Израел.

Палестинците бунтовници истрелаа стотици ракети кон Тел Авив по воздушните напади од непријателот врз Појасот Газа, при што била уништена и кулата Ханади којашто е седиште на раководството на Хамас. Израел, пак, тврди дека ги напаѓа нивните позиции поради ракетирањата врз Ерусалим и други места. Во вооружената пресметка загинаа над 40 лица, вклучувајќи и десетина деца.

-Газа и Ерусалим повторно ја нацртаа мапата, се обединува онаа Палестина што ја познаваме ние за доброто на Ерусалим и Ал Акса, за доброто на сите свети места, изјави, Џамал ал Тавил, лидер на Хамас на Западниот Брег.

Иран ги повика Палестинците да ги здружат силите против непријателот.

-Слабоста на Зионистите е разоткриена пред сите, и сите се обврзани да заземат став и да го осудат овој зол, див и брутален злостор. Палестинците мора да стана посилни и да се спротивстават, да ја натераат спротивната страна да запре со злосторствата и да им се предаде на правдата и праведноста, изјави Ајатолах Али Хамнеи, Врховен лидер на Иран.

Тензиите почнаа да се зголемуваат во последните неколку недели откако беа регистрирани серија насилни судири меѓу израелската полиција и палестинските демонстранти кај џамијата Ал Акса, која се смета за свето место и за муслиманите и евреите. Состојбата дополнително се влоши со планот за протерување на палестинските семејства од населбата Шеик Џарах во источен Ерусалим.

Маја С. Филдишев