Наскоро нов ИПАРД оглас
Наскоро треба да биде објавен нов оглас од ИПАРД 2 програмата. Финансиската поддршка е 65 проценти од инвестициите во руралните средини за вложувања во мали бизниси и во занаетчиство. Во меѓувреме сите заинтересирани кои сакаат да аплицираат треба да ги обезбедат потрените документи.
Производство на прехрамбени производи и пијалоци, занаетчиски дејности, развој на услуги за руралното население како и промоција на руралниот туризам, се дел од инвестициите кои можат да бидат финансиски поддржани со ИПАРД 2 програмата. На огласот кој наскоро треба да биде објавен ќе може да се отвораат нови или да се модернизираат погони за тестенини, колачи, да се отворат или унапредуваат фарми за одгледување на зајаци, дивеч, полжави, риби, насади за дрва и дрвна маса, како и отворање на ресторани кои нудат угостителски и сместувачки услуги.
Агенцијата за финансиска поддршка во земјоделството, ги информира сите земјоделци, занаетчии, мали фарми и фирми дека во тек е подготвителниот рок за комплетирање на потребната документација за аплицирање и добивање на финансиската поддршка.
Согласно програмата 65 проценти од прифатливите трошоци за реализиација на инвестициите ќе им бидат вратени на земјоделците, занаетчиите и стопанствениците.
Преку оваа мерка за „Диверзификација на фарми и развој на мали бизниси“ се создаваат услови за развој на малите и микро претпријатија кои ќе помогнат во развој на руралните средини.
Методија Трајков