Русија протера македонски дипломат

Еден месец по протерувањето на рускиот дипломат од Скопје, официјална Москва одговори со реципрочна мерка. В.д. амбасадорката во македонската амбасада, Оливера Чаушевска-Димовска е повикана во тамошното Министерство за надворешни работи, каде што ѝ била врачена нота за прогласување на наш дипломат - аташе во амбасадата за непожелна личност. 

„Оваа мерка е одговор на немотивираната одлука на македонската држава за прогласување на дипломат од амбасата на Русија во Скопје за персона нон грата“, сооштија од руското МНР.

Се огласи и Македонското министерство за надворешни работи. Оттаму потврдуваат дека амбасадорката била повикана во руското министерство за надворешни и оти и е врачена нота.

„Министерството за надворешни работи искажува жалење за овој неоснован потег на руската страна, кој претставува политичка одлука базирана единствено на начелото на политичка освета, и која со тоа негативно ќе влијае на интензитетот на билатералните односи меѓу двете земји“, соопшти Министерството за надворешни работи.

Потегот на Москва доаѓа откако нашето министерство на 18-ти мај соопшти дека согласно со членот 9 од Виенската конвенција е одлучено руски дипломат од амбасадата да биде прогласен за непожелна личност, откако неговите активности и однесување не биле на нивото кое се очекува од странски дипломат во земјата-домаќин. Тогаш, претседателот Пендаровски  рече дека случајот бил документиран од надлежните институции. Македонија долго време е без амбасадор во Москва, состојба која трае од 2019-та година, кога си замина Гоце Карајанов. За иден амбасадор во Москва беше именуван Ненад Колев, кој сѐ уште не е заминат.

Игор Панов