Русија тестира оружје на Крим

Русија ја тестира подготвеноста на својот систем за противвоздушна одбрана на полуостровот Крим, додека Украина и земјите од НАТО одржуваат воени вежби во Црното Море. Вежбата „Морско ветре“ е проследена со зголемени тензии меѓу НАТО и Москва, која минатата недела објави дека истрелала предупредувачки истрели и фрлила бомби на траекторијата на британскиот воен брод за да ги напушти водите на Црното Море покрај брегот на Крим.

„И благодарам на украинската морнарица и на маринците кои се домаќини на овој настан кој не приближува и заеднички ја прославуваме 21-та по ред вежба Морско ветре“, изјави Стјуарт Бауман, капетан во американската морнарица.

„Овие вежби обединуваат пет континенти и се случуваат во северо-западните делови на Црното Море, во три области на Украина. Имаат за цел одржување на мирот и стабилноста во регионот“, нагласи Олексиј Неижпапа, командир на украинската морнарица.

Вежбите ќе траат две недели. Вклучуваат 5.000 припадници на воениот персонал на НАТО и на други сојузници, како и околу 30 бродови и 40 авиони.

Руската црноморска флота, пак, соопшти дека распоредила 20 борбени авиони и хеликоптери, вклучително и бомбардери СУ-24м, како и С-400 и ракетен систем панцир со ракети земја-воздух, како дел од подготвителниот тест. Москва го смета Крим за дел од Русија, но полуостровот е меѓународно признаен како дел од Украина, која го бара назад.

Руското министерство за одбрана соопшти дека ќе одговори доколку е потребно да се заштити националната безбедност.

Русија минатата недела ги предупреди Велика Британија и Соединетите држави да не ја „предизвикуваат судбината“ испраќајќи воени бродови во Црното Море и рече дека ќе ги брани своите граници со сите можни средства, вклучително и со воена сила.

Марина Ристова