Царовска: Учебната година ќе почне со физичко присуство доколку дозволува епидемиолошката состојба

Учебната година ќе почне со физичко присуство сѐ додека тоа го дозволува епидемиолошката слика, вели министерката Мила Царовска. Оваа одлука треба да ја потврди и Владата на денешната седница. Министерката очекува наставата да се одвива без проблеми затоа што и минатогодишното искуство покажало дека во училиштата немало трансмисија на вирусот. Досега се вакцинирани и 62 насто од наставниците.

„Училиштата се веќе обучени, има протоколи, лани беа отворени за помалите ученици и немавме инциденти на интерно ширење на вирусот. Затоа, за оваа година, во интерес на учениците, Кризниот штаб препорача и денеска имаме владина седница на која очекувам дека ќе биде потврдена одлуката“, изјави денеска Царовска.

Министерката посочи и дека постојано ќе се следат препораките од Комисијата за заштита од заразни болести, а доколку дојде до влошување на состојбата и се зголеми ризикот, потсети дека МОН е подготвено и за две други сценација кои ги претстави минатиот месец – онлајн-настава и комбинирано следење на наставата односно неделно ротирање на групи ученици за настава во училиште и онлајн.