Сѐ уште активни четири пожари

На територијата на цела држава од крајот на јули до средината на август имало над 100 пожари. Во Скопје пак за само 15 дена е интервенирано на 129 локации. 90 биле на отворен простор, но како што велат од Скопската противпожарна бригада, ниту еден не бил вон контрола. На падините на Водно, показна вежба и демонстрација на новонабавената опрема за гаснење пожари во нискостеблеста шума. Со користењето на специјален адитив се спречува ширење на огнената стихија.

А во земјава сѐ уште активни четири пожари. Веќе две недели, иако со намален интензитет гори кај селата Раовиќ и Буковиќ во општина Сарај. Во меѓувреме, олабавување на мерката за целосна забрана за движење во шумите. Планинарите, параглајдеристите и лица кои организирано се движат во шумите, со посебна дозвола ќе можат да ги извршуваат своите активности и како што велат од Центарот за управување со кризи, да помогнат со навремена информација за евентуална појава на пожар. На сила и натаму забраната за движење на Водно и националниот парк „Јасен“.

Договорена е натамошната соработка со американските противпожарни служби. Во наредниот период наши тимови ќе заминат во Америка на обука, а нивни инструктори ќе работат во земјава на имплементација на тактиките и стратегијата во гаснењето на пожарите.

Милчо Велески