Куманово: Да се почитуваат мерките, бројките ќе растат

Четвртиот бран не го одмина ниту Куманово. Само последнава седмица регистрирани се 454 заразени. Од центарот за јавно здравје Куманово потврдуваат дека свадбите, забавите, и масовното непочитување на здравствените препораки и мерки, но и слабиот интерес за вакцинација, доведоа до масовното ширење на делта сојот. Додаваат дека станува збор за кластери во семејства, од кои голем дел биле на прослави, но и се вратиле од летни одмори.

„Станува збор за тренд на зголемување на бројот на заболени, само за две недели промена во инциденца е за 354 проценти. Минатата недела има починати 16 лица, а активни случаи се 708. Очекуваме доколку продолжи непочитувањето на мерките и невакцинирањето, бројот на новозаболени и во текот на наредниот месец наша проценка е дека ќе расте“, истакна Јадранка Стаменковска, епидемилог во ЦЈЗ Куманово.

Актуелната состојба со пандемијата, го зголеми и бројот на тестирања во лабораторијата на Центарот за јавно здравје. На пунктот дневно се реализираат по 100 ПСР тестирања, но и до 250 брзи тестови.

„За жал бројот на позитивни бргу расте последниве денови дури 50 процени од тестираните излегуваат позитивни, што е поразително. Ние сме спремни да одговориме и на поголем наплив, иако персоналот е прилично исцрпен, цело лето работиме без одмори“, вели д-р Дане Милошевски, началник на лабораторија ЦЈЗ Куманово.

Здравствените работници апелираат граѓаните, особено лицата со хронични болести, да ги почитуваат препорачаните заштитни мерки.

Дека е загрижувачка состојбата со коронавирусот во Куманово потврдуваат и од општата болница. Капацитетите на инфективниот оддел и модуларната болница се речиси исполнети. Слободни има само осум места.

Дневната болница во Куманово ја посетуваат 50 пациенти. Бројот на заразени надмина 700.

Елена Георгиевска