Тетово: Тричлено семејство почина од Ковид-19 во својот дом
Во домашни услови минатата недела починале тројца пациенти од исто семејство од тетовско, кои доцна се јавиле на доктор. Во Полошко, бројките за нијанса се намалуваат, но состојбата со Ковид-19 сè уште ризична. Заразата во општините Маврово – Ростуше и Дебар и натаму се шири …
Тројцата пациенти кои починаа во домашни услови биле со придружни болести. Генетскиот фактор, но и ненавременото јавување на лекар, доведува до трагедии, велат здравствените работници.
Се претпоставува дека луѓето се заразиле на некоја семејна прослава каде имало групирање. Во самите семејства треба да има дисциплина, а искуството покажува дека во Тетово не се внимава кога еден член од семејството е позитивен, па често меѓу себе се групираат.
Во Клиничката болница во Тетово бројките незначително се намалуваат. Изминативе 24 часа има 146 амбулантски прегледи, 108 хоспитализирани, двајца починати, на 46-годишна возраст.
А, заразата во општините Маврово-Ростуше и Дебар и натаму се шири. Во Дебар има 39 хоспитализирани сите на кислородна поддршка, а се лекуваат на инфективното и хируршкото одделение. Има зголемен број и на амбулантски прегледи. Свадбите и печалбарите ги зголемија бројките во овој регион.
Позитивно е што во последно време се разбуди свеста и населението од западна Македонија масовно се имунизира, што е единствен спас од заразата, потенцираат здравствените работници.
Зоран Димовски