80-годишниот Ѓорѓи Кузмановски извозе 120 километри на велосипед во чест на независноста
80-годишниот Ѓорѓи Кузмановски за Денот на независноста по 11-ти пат стигна на својата цел. Ја извози 120 километарската велосипедска трка во чест на празникот. Секогаш тргнува од Маврово, но има различна цел. Годинава стигна во Прилеп. Отсекогаш спортист, животот го посветува на еден предизвик: да живее здраво и спортски и да ужива во животните предизвици …
Има речиси 80 години и безвременска желба да истрае. Пријателите го знаат како „Ѓоко на тркала“. Ѓорѓи Кузмановски цел живот е со велосипедот, со моторите и со трките, а веќе 11 години е посветен на потфат. Да ја извози турата за Денот на независноста. Тргнува од Маврово, вози 120 километри и стигнува на различни рути. Сега е во Прилеп, во чест на празникот. Возеше шест часа и се чувствува витално.
11 години го придружува 54-годишниот Дејан Момироски. Возењето велосипед, посебно во денешни времиња не е само предизвик, туку и начин на здраво живеење.
80-годишниот Ѓорѓи Кузманоски е упорен да докаже – здравото живеење е неминовност, и потреба е да се остават траги и пораки за генерациите. Неодамна, како најстар ја заврши државната рели мото-трка, зашто, животот е движење.
Елизабета Кузмановска