Симовски: Пописот се одвива со посакуваниот интензитет

Пописот 2021 се одвива со посакуваниот интензитет, нормално без никакви застои и проблеми, соопшти на денешната прес- конференција во Владата, директорот на Државниот завод за статистика, Апостол Симовски. Заклучно со вчера до 20 часот попишани се 512.457 лица, 158.519 домаќинства и 212.464 станови.

„Вчера, попишавме точно 93.235 лица, 29.491 домаќинство и 40.155 станови. Ова се навистина прекрасни податоци, особено што се работи за работен ден, за разлика од претходните кога беа за време на викенд и очекувано беа повисоки, бидејќи населението е дома. Исклучително сме задоволни и од темпото и од работата на попишувачите и се надеваме дека ваквото темпо ќе продолжи и понатаму и без никаков проблем ќе го завршиме пописот во предвидениот рок“, изјави Симовски.

На почетокот, посочи Симовски, имавме мали технички застои кои се надминати и веќе три дена по ред без никакви проблеми се спроведува попишувањето и интензитетот е исклучително задоволувачки.

Масовниот одѕив покажува за свесноста и одговорноста на секој од нас да придонесе за собирањето податоци, важни за креирање на заедничката иднина. Владата очекува пописот да продолжи со предвидената динамика и сите активности успешно да завршат до 30-ти септември, изјави владиниот портпарол Душко Арсовски.