Уште два дена кампања за првиот круг од локалните избори

Остануваат уште два дена од изборната кампања за првиот круг од Локалните избори 2021 на кои кандидатите можат да ги претстават своите проекти и ветувања пред гласачите. Утре на полноќ почнува предизборниот молк, в недела граѓаните ќе можат да го дадат својот глас за кандидатите за градоначалници и советници.

Карванот на коалицијата „Најдоброто за мојата општина“, предводен од СДСМ денеска е во Кичево, Врапчиште и во Гостивар. ВМРО-ДПМНЕ и коалцијата „Создади нова иднина“, денеска својата програма ја претставуваат пред граѓаните на Берово, Делчево. Левица е во Чешиново и Карбинци. И независните кандидати продолжуваат со претставање на својата предизборна програма.

Гласањето за изборите почнува во сабота, а први ќе гласаат пријавените болни и немоќни, лицата со Ковид-19 и во самоизолација, затворениците, лицата во притвор, во старските домови.

Првпат на овие избори идентификацијата на гласачите ќе се врши со уреди за биометриска идентификација односно со отпечаток од прст, а на изборите, како и за претходните избори, ќе се применуваат мерки за заштита од ширење на Ковид-19.