Последен ден од кампањата за локалните избори
Вечер на полноќ завршува предизборната кампања. Утре ќе гласаат старите и изнемоштени, внатрешнораселените, затворениците, лицата позитивни на Ковид-19 и оние во изолација...
Во пресрет на денешниот последен ден од предизборната кампања за локалните избори на 17-ти октомври, партиите ги продолжуваат активностите со средби со граѓаните. На последниот ден од кампањата караванот „Најдоброто за мојата општина“ на коалицијата предводена од СДСМ ќе одржи предизборни собори во Арачиново, Велес и Куманово.
Коалицијата предводена од ВМРО-ДПМНЕ, пак, ќе ја претстави изборната кампања „Создади нова иднина!“ во Карбинци, Лозово, Свети Николе и во Штип, а прес-конференција ќе одржи и независниот кандидат за градоначалник на Скопје, Данела Арсовска, која е поддржана од оваа коалиција.
Левица ќе има „завршна дружба“ со избирачите во Градскиот парк во Скопје, а средба со граѓаните во скопската општина Центар ќе има и Движењето „Одлучно за промени“ предводено од Зелената партија ДОМ и ЛДП.
Демократската Унија за Интеграција денеска ќе ја заврши изборната кампања таму каде што и ја започна, со собир во Гостивар.
Движењето Беса ќе има изборни активности во Тетово, а прес-конференции ќе одржат и кандидатот за градоначалник на Град Скопје на Твоја партија, Александар Тортевски и носителката на листата на кандидати за советници на НВО „Зелен Хуман Град“ за Скопје, Драгана Велковска.